Asalamoalaykum Ustaza,

JazakAllah khairun for all your efforts in working for Allah's deen. The present Dawrae Quran in Toronto has online listeners from all over the world and I am one of them, Alhamdulillah. Below, I would like to share an incident that happened with me this week. I shared it with my mother who suggested I should email you about it, so that more people could benefit from the signs that Allah (SWT) shows us from time to time in our daily lives. I'm writing it in Urdu so that more people especially from back home can benefit from he lesson in this experience. I hope it is not difficult to read. (Kindly do not share my name please)

_______________________________________________________________________

Iss saal ke dawrae Quran main aap nai tafseer samjhatay huay Allah kee rah main maal denay ke baray main baat kee, aur aap nay kaha ke Allah kee khatir diya jai, aur qarz bhee diya jai tau iss tarha ke jissy diya jaa raha ho uss kee bhee izzat reh jai (yaani usay yaad dila dila kar uss pe ihsaan na jataya jai). Main Canada main naya student hoon, aor abhee semester shuroo honay wala hai. Parhaee ke liyay loan tau mil gaya government say, lekin choonke iss pe sood lag jata hai graduation ke baad, tau yahee fikar thee ke iss me se kam se kam paisay kharch karoon takay waapis dene men mushkil na ho.

Issi haftay mujhay maloom hua ke Pakistan main aik dost ko apnay imtihaan kee fees ke paisay kam par gai (100 dollars ke barabar). Uss ne mujh se nahi mangai lekin men ne socha ke mein khud hee ussay day doon. Dil main khayaal aya ke abhee tau apnay liyay bhee pooray naheen hain, beshak baree amount nahee, sirf 100 dollars hain, lekin nafs ne kaha ke jobless ho abhee aur "qatra qatra daryaa banta hai", tau yeh bhee apnay liyay hee rakh loon. Phir aapkee baat yaad aee ke log qarz day kar jatatay rehtay hain, aur agar woh kisi aor se leta tau ussay kaheen pareshani na ho, socha mujhe uss kee madad karnee chahiyay. Phir se aapkee baat yaad aee, tau apnay nafs ka jaiza liya ke aisa kar ke men kya uskee ihsaan mandee chahta hoon? Jo ke shayad sach tha! Tab faisla kiya ke naheen main yeh Allah kee khatir aik Musalmaan bhai ko de deta hoon, aur ussay email me bhee yahee likha ke tumhain ihsaan mand honay kee zaroorat nahee hai, jab achee job milay gee tau khud hee waapis lay loonga.

Aik androoni khushi ho rahee thee ke pehlee baar Allah kee khatir kisi ko qarz de raha hun. Iss baat ke taqreeban 1.5 say 2 ghantay ke andar hee mujhe maloom hua ke mujhay governemtn kee taraf say apnee taleem ke liyay mukammal grant mil gaee hai balke uss se bhee kaheen zyada! Aur is grant ka mere ilm men hee na tha ke main nay apply bhee kiya hai! Alhamdulillah. uss waqt kee kefiyat alfaaz men likhna mumkin naheen, ab kuch din guzar gaye lekin yaqeen nahee ata ke yeh sab kya hua. Meri niyat yeh nahee thee ke mera apna koi maali (financial) faida ho. Aur kal hee uss dost ne mujse kaha ke uss ke pass paison ka intizaam hogya hai tau mujhe bhejnay kee zaroorat nahee...tau sirf niyat karnay par hee Allah kee aisi madad? SubhanAllah

jazakAllah khairun,